بکر فقير سومرو: بکر فقير ولد صاحبڏنو (اول) سومرو 1787ع ڌاري پنهنجي اباڻي ڳوٺ ڌاران پور ۾ پيدا ٿيو. (اهو ڳوٺ 1837ع واري ٻوڏ ۾ تباهه ٿي ويو). سندس والد بزرگ مياڻي ڳوٺ ۾ ڄائو هو، کيس بلبل ۽ ڪامل نالي ٻه ٻيا پٽ به ٿيا، بکر سندس ننڍو پٽ هو. درياهه کي جيئن ته مناسب جوڳا بچاءَ بند نه هئا، ان ڪري ڪچي وارا ڳوٺ سدائين خطري ۾ رهندا هئا. ان ڪري هي ٽيئي ڀائر لڏي اچي وري مياڻي ۾ ويٺا، جتي سندن خاندان جا ٻيا ماڻهو به آباد هئا. 1937ع کانپوءِ هي ٽِئي ڀائر لڏي اچي ٽنڊي علي شير ۾ ويٺا. بکر فقير هڪ اهل الله ۽ سالڪ هو. هي ميرن جي دؤر جو شاعر هو، سندس ڪجهه بيت به مليا آهن. هن شادي نه ڪئي هئي ۽ سڄي ڄمار ائين گذاريائين. اٺونجاهه سالن جي ڄمار ۾ 1845ع ۾ ٽنڊي علي شير ۾ وفات ڪيائين، سندس مزار به اتي آهي. نموني طور سندس هڪ بيت پيش ڪجي ٿو:
ساجن تنهنجي ساهه جو سوهو ناهي سڀاءُ،
راڻا ايندين رات جو، اٿي ويهه الله
آهي منجهه الله، ڌيان ڌري پهه پچاءِ،
راڻا ’بکر‘ چوي سنجھاءِ، وينڌو ساءِ سپرين.